પ્રથાની બેવડી સફળતા, મૌબોનીનો વિજય, અમદાવાદનું વર્ચસ્વ

copy image

 પ્રથમ ગુજરાત સ્ટેટ રેન્કિંગ ટેબલ ટેનિસ ટુર્નામેન્ટ 2026ની વિમેન્સ ફાઇનલ રોમાંચક બની ગઈ હતી જેને અંતે અમદાવાદની પ્રથા પવારે અમદાવાદની જ ઓઇશિકી જોઆરદારને હરાવીને ટાઇટલ જીતી લીધું હતું.  ફાઇનલ મેચ સોમવારે અહીંના વીર સાવરકર સ્પોટ્સ કોમ્પલેક્સ ખાતે રમાઈ હતી જેમાં પ્રથાનો 4-3થી વિજય થયો હતો.

ગુજરાત સ્ટેટ ટેબલ ટેનિસ એસોસિયેશનના નેજા હેઠળ ટેબલ ટેનિસ એસોસિયેશન ઓફ અમદાવાદ (ટીટીએએ)ના ઉપક્રમે આ ટુર્નામેન્ટ યોજાઈ હતી જેને સપોર્ટ્સ ઓથોરિટી ઓફ ગુજરાતનો સહકાર સાંપડ્યો હતો.

વિમેન્સ વિભાગની ફાઇનલ મેચ રસાકસીભરી રહી અને બંને ખેલાડીએ હાર માનવાનો ઇનકાર કર્યો હતો. પ્રથાએ શરૂઆતની બે ગેમ 16-14, 11-8થી જીતી, પરંતુ ઓઇશિકીએ ત્રીજી ગેમ 11-8થી જીતી લીધી હતી. પ્રથાએ ચોથી ગેમ 11-8થી જીતીને ફરીથી લીડ મેળવી લીધા બાદ ઓઇશિકીએ પાંચમી અને છઠ્ઠી ગેમ જીતીને મેચને નિર્ણાયક તબક્કામાં લાવી દીધી હતી. અંતિમ ગેમમાં પ્રથાએ પોતાની હિંમત જાળવી રાખીને 14-12થી બાજી મારી દેતાં વિમેન્સ ટાઇટલ હાંસલ કર્યું હતું.

આ વિજયથી પ્રથા  પવાર માટે યાદગાર બેવડી સફળતા પૂર્ણ થઈ હતી. તેણે અગાઉ જુનિયર ગર્લ્સ (અંડર-19) ટાઇટલ જીત્યું હતું. તેણે સેમિફાઇનલમાં આફરીન મુરાદના મજબૂત પડકારને પાર કર્યા બાદ ફાઇનલમાં સુરતની દાનિયા ગોદિલને 4-1થી હરાવી હતી.

સોમવારે ટુર્નામેન્ટના અંતિમ દિવસે અમદાવાદે જુનિયર ગર્લ્સ (અંડર-17) કેટેગરીમાં વધુ એક પ્રભાવશાળી પ્રદર્શનની કર્યું હતું. જ્યાં મૌબોની ચેટરજીએ ટાઇટલ જીત્યું હતું. તેણે સેમિફાઇનલમાં ભાવનગરની ચાર્મી ત્રિવેદીને 3-2થી હરાવીને કઠીન પડકાર ધરાવતી ફાઇનલમાં દાનિયા ગોદિલને 3-2થી હરાવી હતી.

યુવા વર્ગોમાં  અમદાવાદની અનાયરા મણિયાર અને સયાંશ ક્રિસ્ટીએ અનુક્રમે હોપ્સ (અંડર-9) ગર્લ્સ અને બોયઝ ટાઇટલ જીત્યા હતા તો નક્ષ પટેલે કેડેટ (અંડર-13) બોયઝનો તાજ જીતીને અમદાવાદની સફળતા આગળ ધપાવી હતી. જ્યારે પોડિયમ પર ટોચનું સ્થાન મેળવનારા અન્ય ખેલાડીઓમાં રેહાંશ સિંઘવી (અંડર-11 બોયઝ), પ્રિશા પરેશ (અંડર-11 ગર્લ્સ), ધિમહી કારબરાવાલા (અંડર-13 ગર્લ્સ), દેવ ભટ્ટ (અંડર-15 બોયઝ) અને દાનિયા ગોદિલ (અંડર-15 ગર્લ્સ)નો સમાવેશ થાય છે.