માંડવીમાં સગીર દીકરીને આપઘાત માટે મજબૂર કરનાર પિતાને આજીવન કેદ!
આજથી પાંચેક વર્ષ પૂર્વેના માંડવીના ચકચારી અને સમાજ માટે શર્મસાર કરતા બનાવમાં પિતાએ જ સગીર પુત્રી પાસે બીભત્સ માગણી કરતાં પિતાનાં આ કૃત્યથી તંગ આવી સગીરાએ ગળેફાંસો ખાઇ જીવન ટૂંકાવ્યું હતું . મળેલ માહિતી મુજબ પાપી પિતાનાં આ કૃત્ય સબબ ભુજની ખાસ અદાલતે ધાક બેસાડતો ચુકાદો આપી આ નિર્દય પિતા આરોપીને આજીવન સખત કેદ તથા રૂા. એક લાખનો દંડ ફટકાર્યો છે. સમાજ માટે કલંકરૂપ અને ચકચારી એવા આ બનાવની વિગતો અનુસાર માંડવીના દીવાદાંડી પાસે રહેતો અને ઓમાનમાં કામધંધો કરતો આરોપી પોતાનાં ઘરે માંડવી અવાર-નવાર આવતો-જતો હતો. આ દરમ્યાન તેણે પોતાની 17 વર્ષની સગીર દીકરી સાથે વીડિયોકોલ તથા રૂબરૂમાં અશ્લીલ – બીભત્સ વાતો કરી માનસિક ત્રાસ આપતો હતો અને બીભત્સ – અયોગ્ય માગણીઓ મૂકી હતી. પિતાનાં આ કૃત્યથી તંગ આવીને દીકરીએ ગળેફાંસો ખાઇ આત્મહત્યા કરી લીધી હતી. આ અંગે તા. 20/9/2021ના માંડવી પોલીસ મથકે મરવા મજબૂર કર્યા અંગે સહિતની કલમો તળે આરોપી કમલેશ વિરુદ્ધ ગુનો નોંધાયો હતો. જે-તે સમયના તપાસ અધિકારી પી.આઇ. આર. સી. ગોહિલ દ્વારા પૂરતા પુરાવા સાથે કોર્ટમાં ચાર્જશીટ દાખલ કરાઇ હતી. ટ્રાયલ દરમ્યાન પીડિતા સગીરા હોવાનું સામે આવતાં કલમમાં સુધારો થયો હતો. આ કેસ ભુજના સ્પે. જજ જે.એ. ઠક્કરની અદાલતમાં ચાલી જતાં ફરિયાદ પક્ષે 17 દસ્તાવેજી પુરાવા તથા 10 સાક્ષી તપાસી આરોપીને તકસીરવાન ઠેરવી આજીવન સખત કેદની સજા તથા રૂા. એક લાખનો દંડ ફટકાર્યો છે અને ભોગ બનનારની માતાને રૂા. પાંચ લાખનું વળતર ચૂકવવા માટે ડી.એલ.એસ.એ ભલામણ કરવા હુકમ કર્યો છે. ફરિયાદ પક્ષે મુખ્ય સરકારી વકીલ એચ. બી. જાડેજાએ હાજર રહી સાક્ષી તપાસી અને દલીલો કરી હતી.
