કોટડામાં ઘરમાંના થેલામાંથી રોકડ-દાગીના ચોરનારાની અટકાયત

નખત્રાણા તાલુકાના કોટડા (જ.)માં વડીલ દંપતીના ઘરમાં રાખેલા થેલામાંથી રોકડા રૂા. 40,000 અને ચાંદીના દાગીના કિં. રૂા. 96,500ની થેલીઓની રાત વચ્ચે તસ્કરી થયાની ફરિયાદ પોલીસ ચોપડે નોંધાઇ હતી. દરમ્યાન, નખત્રાણા પોલીસે આ કામના બે આરોપીને મુદ્દામાલ સાથે ઝડપી ચોરીનો ભેદ ઉકેલ્યો છે. આ અંગે મળતી માહિતી મુજબ નખત્રાણા પોલીસ મથકે, 81 વર્ષીય વડીલ અને ગામમાં વાસણની છૂટક વેચાણની દુકાન ચલાવતા વિશનજીભાઇ કંસારાએ નોંધાવેલી ફરિયાદ અનુસાર ઘરે સંતાન ન હોવાથી રોકડા અને દાગીના સાથે રાખતા હતા. ગત તા. 3-9ના રાત્રે દુકાન બંધ કરી તેમની સાથેના મોટા થેલામાં રોકડ તથા દાગીનાની થેલીઓ તેમાં નાખી ઘરે લઇ જઇ રૂમમાં ખુરશી ઉપર રાખી દીધો હતો. બીજા દિવસે સવારે ઊઠીને જોતાં આ મોટા થેલામાંથી રોકડ તથા દાગીનાવાળી થેલીઓ જોવા મળ્યા નહોતા. ફરિયાદીએ પોતાની રીતે તપાસ કરી પરંતુ કયાંય જોવા મળી નહીં. આમ રાત વચ્ચે રોકડા રૂા. 40,000 તેમજ દાગીના ચાંદીની ચાર અને બે બંગડી, ચાંદીના ત્રણ કડા અને એક પોંચી, બે ચાંદીની ચેઇન એમ કુલ્લે રૂા. 96,500ના ચાંદીના દાગીના સહિત કુલ્લે રૂા. 1,36,500ના મુદ્દામાલની કોઇ અજાણ્યો ચોર ઇસમ ચોરી કરી ગયો હતો. પોલીસે ચોરીની ફરિયાદ નોંધી તપાસ હાથ ધરતાં આ કામના ગામના જ બે આરોપીને નખત્રાણા પોલીસે ચોરાઉ મુદ્દામાલ સાથે ઝડપી ચોરીનો ભેદ ઉકેલી લીધો છે.