રાજકોટ, જસદણ ,રાજુલા, શાપર-વેરાવળમાં વીજળીના કડાકા ભડાકા સાથે ધોધમાર વરસાદ, ખાંભા પંથકમાં અડધી કલાકમાં 2 ઇંચ

રાજકોટ: સૌરાષ્ટ્રમાં આજે ત્રીજા દિવસે બપોર પછી વાતાવરણમાં પલ્ટો જોવા મળ્યો હતો. સવારે અસહ્ય બફારા વચ્ચે લોકો પરેશાન થઈ ગયેલા. જ્યારે બપોર પછી કાળા વાદળો સાથે આકાશ ઘેરાયું જોવા મળ્યું. અને વરસાદનું આગમન થયું હતું. રાજકોટમાં વીજળીના કડાકા ભડાકા સાથે અમી છાંટણા થતા લોકોમાં ખુશી છવાઈ ગઈ હતી.રાજકોટના શાપર-વેરાવળમાં પવન સાથે ધોધમાર વરસાદ પડતાં માર્ગો પર પાણી ભરાયા હતા. જસદણ પંથકમાં વીજળીના કડાકા ભડાકા સાથે વરસાદ પડ્યો હતો. જસદણના ગ્રામ્ય વિસ્તારોમાં ભારે પવન ફુંકાયો હતો અને ધોધમાર વરસાદ પડ્યો હતો. જ્યારે રાજુલાના મોટા આગરીયા, નવા આગરીયા સહિતના ગ્રામ્ય વિસ્તારોમાં ધોધમાર વરસાદ પડ્યો હતો. ખાંભા પંથકમાં માત્ર અડધી કલાકમાં બે ઇંચ જેટલો વરસાદ નોંધાયો છે. રાજકોટ ગ્રામ્ય બાદ શહેરના વાતાવરણમાં પલ્ટો આવ્યો છે. અચાનક શહેરમાં કાળા ડિબાંગ વાદળા છવાયા છે. અસહ્ય ઉકળાટ બાદ અચાનક શહેરમાં પવન ફૂંકાવા લાગ્યો છે. શહેરના કેટલાક વિસ્તારોમાં વરસાદી છાંટા પડ્યા હતા. ખેડૂતો વાવણીલાયક વરસાદની રાહ જોઇ રહ્યા છે.

ગોંડલ તાલુકામાં પણ ધોધમાર વરસાદ વરસ્યો હતો. ગોંડલના ભરૂડી પાસે ધોધમાર વરસાદ વરસતા ખેતરોમાં પાણી ભરાયા છે. તેમજ ભુણાવા ગામે પણ ધોધમાર વરસાદ પડ્યો હતો. ગોંડલના ST ડેપોમાં વૃક્ષ પડતા ત્રણ મોટરસાયકલનો કચ્ચરઘાણ વળી ગયો હતો. ખાંભાના ભાવરડી, નાનુડી, ચતુરી સહિતના ગામમાં વરસાદ વરસ્યો હતો. વરસાદથી બાળકો ન્હાવા માટે અગાસી પર ચડ્યા હતા અને ચહેરા પર ખુશી જોવા મળી હતી. વાતાવરણમાં ઠંડક પ્રસરતા લોકોએ ગરમીમાંથી રાહત મેળવી છે. ખાંભા સહિત ઇંગોરાળા, નાનુડી, ભાડ, સરકડીયા સહિતના ગામોમાં એડધી કલાકમાં બે ઇંચ વરસાદ વરસતા રસ્તા પર ગોઢણડૂબ પાણી ભરાયા હતા. વાવણીલાયક વરસાદ વરસતા ખેડૂતોમાં ખુશી જોવા મળી રહી છે. ખાંભાના ધાતરવાડી નદીમાં પાણી વહંતુ થઇ ગયું હતું.  ધાતરવાડી નદી નજીક પસાર થતા હાઇવે પર પાણી ફરી વળ્યા હતા. ગોંડલ શહેરમાં અનેક જગ્યાએ ભારે પવનથી વૃક્ષો અને હોર્ડિંગ્સો ધરાશાયી થયા છે. શહેરમાં વીજ પૂરવઠો ખોરવાયો છે. ભાવનગર જિલ્લાના તળાજા, મહુવા પંથકમાં પણ વરસાદ વરસ્યો હતો. આજે બપોર બાદ વાતાવરણ ગોરંભાયું હોય જેને પગલે આજે આ વિસ્તારોમાં વરસાદી માહોલ જોવા મળી રહ્યો છે. જેમાં મહુવા શહેર અને પંથક તેમજ તળાજાના અલંગ અને પીથલપુરમાં ધોધમાર વરસાદ વરસ્યો હતો. ખેતરોમાં પણ પાણી ભરાય ગયાના દ્રશ્યો જોવા મળી રહ્યા છે. ભીમ અગિયારસ આજુબાજુ સામાન્ય રીતે વાવણીલાયક વરસાદની ખેડૂતો રાહ જોતા હોય છે. જ્યારે આ વર્ષે વરસાદ પણ વહેલો હોય તેવું લાગી રહ્યું છે. હજુ ગુજરાતમાં સત્તાવાર વરસાદનું આગમન થયું નથી. પરંતુ આગતર વાવણી થાય તેની ખેડૂતો રાહ જોઈ રહ્યા છે. બગદાણામાં પણ ઘોઘમાર વરસાદ વરસ્યો હતો.

જામનગર જિલ્લાના કાલાવડ તાલુકામાં સતત ત્રીજા દિવસે વરસાદ વરસ્યો હતો. શહેર અને આસપાસના ગામોમાં કાલાવડ, આણંદપર, જશાપર, શીશાંગ સહિતના ગામોમાં વરસાદ વરસ્યો હતો. સતત ત્રીજા દિવસે વરસાદ વરસતા ખેડૂતોમાં ખુશીની લાગણી જોવા મળી રહી છે.યાત્રાધામ વીરપુરમાં મિની વાવાઝોડા સાથે ધીમી ધારે વરસાદ વરસ્યો હતો. ભારે પવનને કારણે દુકાનોના છાપરા પરના પતરા ઉડ્યા હતા. સતત બીજા દિવસે ભારે પવનને લઇને મિની વાવાઝોડા જેવો માહોલ સર્જાયો હતો. ભારે પવનને કારણે શહેરમાં વીજળી ગુલ થઇ હતી. ભારે પવન સાથે વરસાદને લઇ વૃક્ષો ધરાશાયી થયા હતા.