SOG દ્વારા બોગસ ડોકટર ની ધરપકડ કરાય
ગઈકાલે રાજકોટની શ્રમજીવી સોસાયટીમાં SOG પોલીસ દ્વારા ડુપ્લિકેટ તબીબ પરેશ પટેલના ક્લિનિક અને તેના ગોડાઉનમાં દરોડા કરવામાં આવ્યા હતા. અહીંથી શંકાસ્પદ દવાનો જથ્થો મળી આવ્યો હતો. જે સતત બીજા દિવસે ચાલુ રાખી તેમની અન્ય જગ્યા પર દરોડાની કામગીરી હાથ ધરી છે. પોલીસ પૂછપરછમાં પરેશ પટેલે કબૂલ્યું હતું કે, તે અલગ અલગ જગ્યાઓથી એક્સપાયર થયેલા સીરપ કે જે કફ, કિડની તેમજ અન્ય વિટામિનની દવાઓ લઈ આવતો હતો. સીરપને ડ્રમમાં નાંખી તેમાં ચૂર્ણ તેમજ ચ્યવનપ્રાશ નાખીને આયુર્વેદિક દવાનું લેબલ લગાવીને ઇમ્યુનિટી બુસ્ટર, મધુમેહ નાશક જેવા નામથી વેચતો હતો. આવી લાખોનો દવાનો જથ્થો જપ્ત કરાય છે.
આ ઉપરાંત તેની બીજી 3 દુકાન હોવાની પણ કબૂલાત આપતા ત્યાં પણ સ્ટાફ પહોંચ્યો હતો. આ દરમિયાન ફૂડ એન્ડ ડ્રગ્સ વિભાગના આસિસ્ટન્ટ કમિશનર ડ્રગ્સ એસ.એસ.વ્યાસને જાણ કરાતા તેઓ પણ સ્ટાફ સાથે પહોંચી ગયા હતા અને દવાઓના નમૂના લઈને તપાસાર્થે લેબમાં મોકલ્યા છે. આ ઉપરાંત દવાઓ વેચવા માટે તેની પાસે લાઇસન્સ છે કે નહિ તેમજ તે લાયસન્સ પણ બનાવટી છે કે કેમ તે અંગે પણ વિભાગ તપાસ કરશે. હાલ તે ગોડાઉનમાંથી એક કરોડથી વધુની કિંમતનો દવાનો જથ્થો જપ્ત કરાયો છે. બે દિવસ સુધી દવાના શોર્ટિંગની કામગીરી થશે.
રાજકોટ શહેરના શ્રમજીવી સોસાયટીમાં SOG પોલીસે બોગસ ડોક્ટર પરેશ પટેલના પટેલ ક્લિનિકમાં કિડનીની દવાના નામે લોકોના સ્વાસ્થ્ય સાથે ચેડા થતા હોવાની બાતમીના આધારે દરોડા પાડ્યા હતા. જેમાં પોલીસે ફુડ એન્ડ ડ્ર્ગ્સ વિભાગને જાણ કરી સાથે રાખી કાર્યવાહી હાથ ધરી છે. ગઈકાલથી ચાલતા આ દરોડા સતત બીજા દિવસે ચાલુ છે. દરમિયાન પોલીસે શંકાસ્પદ દવાનો જથ્થો કબ્જે કરી સેમ્પલ મેળવવા તજવીજ હાથ ધરી છે. તેમજ પરેશ પટેલની પૂછપરછ કરી દવાના લાયસન્સની માગ કરવામાં આવી રહી છે. જોકે હજુ સુધી કોઈ પુરાવા પોલીસ સમક્ષ રજૂ કરવામાં આવ્યા નથી.
ફૂડ એન્ડ ડ્રગ ડિપાર્ટમેન્ટના અધિકારી એસ.એસ.વ્યાસે જણાવ્યું હતું કે, એક્સપાયરી ડેટ વાળી દવાના સ્ટીકર બદલાવી નવી ડેટ નાખી દવા વેચતા હોવાની માહિતી સામે આવી રહી છે. કિડનીના રોગ માટેની દવા ઉપરાંત અન્ય દવા જથ્થો પણ ઉપલબ્ધ છે. જેના સેમ્પલ મેળવી પરીક્ષણ અર્થે મોકલી કાર્યવાહી કરવામાં આવશે.
રિપોર્ટર:-ચીમન મહિડા રાજકોટ
