પેટલાદ તાલુકાના ધર્મજમાં લગ્નમાં આવેલા વેપારીની કારમાંથી 13 હજારની તસ્કરી
પેટલાદ તાલુકાના ધર્મજમાં લગ્નપ્રસંગમાં હાજરી આપવા આવેલા અમદાવાદના વેપારીની કારનો કાચ તોડી તેમાંથી રોકડા રૂપિયા 13 હજાર અને કપડાં સહિતનો સામાન તસ્કરી થતાં સમગ્ર મામલો પેટલાદ ગ્રામ્ય પોલીસ સ્ટેશને પહોંચ્યો હતો.મૂળ અમદાવાદના અને ધર્મજ ખાતે સાસરી ધરાવતાં વેપારી દિપેશભાઈ કાળીદાસભાઈ પટેલ તેમના સંબંધીને ત્યાં લગ્નપ્રસંગ હોય તેમાં હાજરી આપવા માટે પરિવાર સાથે કાર લઈને આવ્યા હતા. દરમિયાન, તેઓએ ધર્મજ સ્થિત જલારામ મંદિર પાસે જમણવાર હોય મંદિર બહાર પાર્કિંગમાં તેમણે તેમની કાર પાર્ક કરી હતી. બાદ તેઓ પરત આવ્યા હતા. એ સમયે તેમની જમણી સાઈડનો પાછળનો કારનો કાચ તૂટેલી હાલતમાં જોતાં જ તેઓ ચોંકી ઉઠ્યા હતા. તેમણે તપાસ હાથ ધરતાં કારમાં મૂકેલી કપડાંનું પર્સ તથા રોકડ રૂપિયા 13 હજારની રકમ ભરેલું પર્સ તસ્કરી થઈ ગયું હોવાનું માલૂમ પડ્યું હતું. આ મામલે તેમણે પેટલાદ ગ્રામ્ય પોલીસ સ્ટેશને ફરિયાદ લખાવતા પોલીસે તસ્કરીનો ગુનો નોંધી સીસીટીવી ફૂટેજના આધારે કાર્યવાહી હાથ ધરી છે.
