બૅન્કમાંથી બોલું છું કહીને સરગાસણના યુવક સાથે 80 હજારની ઠગાઇ

ગાંધીનગર સરગાસણના યુવકને બૅન્કમાંથી બોલું છું કહીને ક્રેડિટ કાર્ડ નંબર માગી ઈસમએ 80 હજાર ઉપાડી લેતાં અડાલજ પોલીસ સ્ટેશનમાં ફરિયાદ દાખલ કરી છે. મુકેશભાઈ વિઠ્ઠલભાઈ ચોવટિયા (રહે. શ્રી શરણમ સોસાયટી, સરગાસણ, ગાંધીનગર) શહેરમાં ધંધો કરે છે. મુકેશભાઈના મોબાઇલ ઉપર એક ઈસમએ ફોન કર્યો હતો અને બૅન્ક કર્મચારી તરીકે પોતાની ઓળખાણ આપી હતી. થોડો સમય વાતોમાં રાખ્યા પછી યુવક પાસે રહેલા ક્રેડિટ કાર્ડનો નંબર માગ્યો હતો. યુવકે નંબર આપ્યા બાદ એક ઓટીપી યુવકના મોબાઇલ નંબર ઉપર આવ્યો હતો. તે પણ ઈસમએ માગતાં યુવકે ઓટીપી નંબર આપ્યો હતો. ઓટીપી નંબર આપ્યા બાદ યુવકના બૅન્ક ખાતામાંથી રૂ.79,995 ઉપડી ગયા હતા. નાણાં ઉપડી ગયા બાદ યુવકને ખબર પડી હતી કે, અજાણ્યો ઈસમ બૅન્ક કર્મચારીની ઓળખ આપીને 80 હજારનો ચૂનો લગાવી ગયો હતો. જેને લઇને આ બાબતની ફરિયાદ અડાલજ પોલીસ સ્ટેશનમાં લખાવતા પોલીસ દ્વારા કાર્યવાહી હાથ ધરવામાં આવી હતી.