હિંમતનગરના ખાડિયા વિસ્તારમાં શોર્ટ સર્કિટના લીધે વીજ ડીપીમાં આગ લાગી ઉઠતાં ફાયર વિભાગે આગ બુઝાવી
હિંમતનગર શહેરના ખાડિયા વિસ્તારમાં રવિવારે મોડી રાત્રે અચાનક શોટ સર્કિટના લીધે આગ લાગતા ડીપીનું બોક્ષ બળી ગયું હતું. ફાયર વિભાગને જાણ કરવામાં આવતા ફાયર ફાઈટરની ટીમ ઘટના સ્થળે આવી આગ બુઝાવી હતી. તો રાત્રી દરમિયાન અંધારપટ છવાયો હતો. સોમવારે સવારે કામગીરી શરૂ કરીને વીજ પ્રવાહ પૂર્વવત કરવામાં આવ્યો હતો.
મળતી માહિતી અનુસાર ખાડિયા વિસ્તારમાં રવિવારે મોડી સાંજે સાડા છ વાગ્યાના સુમારે વીજ ડીપી પર ધડાકા સાથે આગ લાગી ગઈ હતી. જોત જોતામાં આગ આજુબાજુ ફેલાઈ ગઈ હતી. સ્થાનિક રહીશો અને પાલિકાના વોર્ડના સદસ્ય દીકુલ ગાંધી અને જાનકી રાવલ ઘટના સ્થળે આવી પહોચ્યા હતા. ત્યાર પછી આગની ઘટના અંગે ફાયર વિભાગને જાણ કરવામાં આવી હતી.
આગ લાગ્યાની જાણ થયા પછી ફાયર વિભાગ ઘટના સ્થળે આવી પહોચ્યું હતું અને આગ બુઝાવી હતી. તો બીજી બાજુ UGVCL વિભાગના અધિકારીઓને જાણ કરવામાં આવતા ઘટના સ્થળે કર્મચારીઓ તાત્કાલિક આવી પહોંચ્યા હતા. વીજ ડીપીમાં ધડાકા પછી આગ લાગતા બોક્ષ બળી ગયું હતું. તો અન્ડર ગ્રાઉન્ડ કેબલ પણ ડેમેજ થયો હતો. જેને લઈને રાત્રીના સમયે કામગીરી કરી શકાય તેમ હતી નહિ. તો બીજી બાજુ ખાડિયા વિસ્તારમાં રાત્રી દરમિયાન અંધારપટ છવાઇ ગયો હતો.
UGVCL વિભાગે સોમવારે વહેલી સવારે કર્મચારીઓએ કામગીરી શરૂ કરી હતી. લગભગ બે કલાકની કામગીરી પછી વીજ પ્રવાહ પૂર્વવત કરી દેવાયો હતો. તો ડીપી નીચેનું બોક્ષ સળગી જતા બદલી દેવાયુ હતું. તો અન્ડર ગ્રાઉન્ડ ડેમેજ થયેલા વાયર પણ રીપેરીંગ કામગીરી હાથ ધરવામાં આવી હતી.
