કરજણ ટોલનાકા અને એક્સપ્રેસ વે પરથી એલસીબીએ રૂા.60.81 લાખનો દારૂના જથ્થા સાથે 2ની ધરપકડ કરી
વિધાનસભા ચૂંટણીને લઇ દારૂની હેરફેર રોકવા જિલ્લા પોલીસ એક્શનમાં આવી છે. જિલ્લાના કરજણના ભરથાણા ટોલનાકા પાસેથી 36.91 લાખ અને આજોડની સીમ પાસેથી પસાર થતા એક્સપ્રેસ વે પાસેથી 23.89 લાખ સહિત કુલ 60.81 લાખનો દારૂ એલસીબીએ ઝડપી પાડ્યો હતો. પોલીસે 80.94 લાખનો મુદ્દામાલ જપ્ત કર્યો હતો.
એલસીબી પોલીસના જવાનો ભરથાણા ટોલનાકા મધ્યે વોચમાં હતા ત્યારે બાતમી મુજબના ટેમ્પોને રોકાવી તેમાં તપાસ કરવામાં આવી હતી. જેમાં રૂા.36.91 લાખની વિદેશી દારૂની 9264 બોટલ મળી હતી. પોલીસે દારૂ, આઇસર ટેમ્પો સહિત 46.99 લાખના મુદ્દામાલ સાથે બેની અટકાયત કરી હતી.
આ અંગે કરજણ પોલીસ સ્ટેશનમાં ગુનો નોંધાવાયો હતો. આઈદાનરામ જેહારામ જાટ તથા વિનસિંગ લાલસીંગ રાવણા (બંને કોલું, બાયતું, બાડમેર, રાજસ્થાન)ની અટકાયત કરી ટેમ્પો આપનાર રાજુરામ જાટ (સચોર, રાજસ્થાન) તથા દારૂ મગાવનાર અને મોકલનાર વિરુદ્ધ કરજણ પોલીસ સ્ટેશનમાં ફરિયાદ દાખલ કરી તપાસ હાથ ધરી છે.
ગ્રામ્ય જિલ્લા એલસીબીના પીએસઆઇ કે.એ.પટેલ અને તેમની ટીમને કન્ટેનરમાં દારૂ અમદાવાદ તરફ જતો હોવાની માહિતી મળી હતી. જેથી આજોડની સીમમાં પસાર થતા એક્સપ્રેસ વે નજીકથી કન્ટેનર પકડ્યું હતું. જેમાંથી રૂા.23.89 લાખની વિદેશી દારૂની 13,080 બોટલો મળી આવી હતી.
કન્ટેનરના ચાલક ધરમપાલ બનવારીલાલ ગુર્જર (રહે. ભેરુબાંસ ઝાંઝર, જિ.ઝુનઝુન, રાજસ્થાન)ની અટકાયત કરી હતી. તેની પૂછપરછમાં દારૂનો જથ્થો ભિવંડી મહારાષ્ટ્રથી મીર સુભાષ ગુર્જર (દેવપુરા)એ ભરાવ્યો હતો અને અમદાવાદ મધ્યે ડિલિવરી કરવાની હોવાનું ખૂલ્યું હતું. પોલીસે દારૂ, કન્ટેનર સહિત 30.94 લાખનો મુદ્દામાલ જપ્ત કરી મંજૂસર પોલીસને હવાલે કરવામાં આવ્યો છે.
