ભરૂચમાં કરિયાણાની દુકાનની આડમાં દારૂ વેચતો બૂટલેગર પકડાયો
ભરૂચ શહેરના દાંડિયાબજાર મચ્છીમાર્કેટમાં આવેલી એક કરિયાણાની દુકાનમાં વિદેશીદારૂનું વેચાણ થયું હોવાથી એ ડિવિઝન પોલીસની ટીમે સ્થળ પર રેડ પાડી હતી. ટીમે દુકાનમાંથી વિદેશીદારૂની 4 બોટલો કબ્જે કરી તેની સામે ગુનો દાખલ કર્યો હતો. તેમજ તેને દારૂ આપી જનાર બુટલેગરને વોન્ટેડ જાહેર કરવામાં આવ્યો હતો.
ભરૂચ એ ડિવિઝન પોલીસ સ્ટેશનનો સ્ટાફ પેટ્રોલિંગ કરી રહ્યો હતો તે સમયે તેમને ચોક્કસ બાતમી મળી હતી કે, શહેરના દાંડિયાબજાર મચ્છીમાર્કેટ નજીક શિવમ જનરલ કરિયાણા સ્ટોર ચલાવતો નિલેશ સતિષ રાણા દુકાનની આડમાં દારૂનો વેપલો કરે છે. જેના પગલે ટીમે તેની દુકાને દરોડો પાડ્યો હતો. ટીમે નિલેશ રાણાને પકડી પાડી દુકાનમાં તપાસ કરતાં એક ટેબલના ખાનામાં મુકેલી કોલેજ બેગમાં વિદેશીદારૂની 4 બોટલો મળી આવી હતી.
જેના પગલે પોલીસે તેની પુછપરછ કરતાં શક્તિનાથ પાસે આવેલા મહાવીર નગર મધ્યે રહેતો વિનય મહેન્દ્ર વસાવા તેને દારૂ આપી ગયો હોવાની કેફિયત રજૂ કરી હતી. ટીમે દુકાનમાંથી વિદેશીદારૂની 4 બોટલો કબ્જે કરી તેની સામે ગુનો દાખલ કર્યો હતો. તેમજ તેને દારૂ આપી જનાર બુટલેગરને વોન્ટેડ જાહેર કરાયો હતો.જેના પગલે ટીમે બંને સામે ગુનો દાખલ કરી વિનય વસાવાને વોન્ટેડ જાહેર કરી આગળન કાર્યવાહી હાથ ધરી છે.
