કારમાં ચોરખાના બનાવીને વિદેશી દારૂ લઈ જતા રાજસ્થાનના 2 શખ્સોને એલસીબીએ ઝડપ્યા
કારમાં બનાવેલા ચોરખાનામાં વિદેશી દારૂનો જથ્થો સંતાડીને જઈ રહેલા રાજસ્થાનના બે ઇસમોને મહેસાણા એલસીબીએ બહુચરાજી નજીકથી પકડી પાડ્યા હતા. પોલીસે રૂ.64 હજારનો દારૂ અને કાર મળી રૂ.3.74 લાખનો મુદ્દામાલ જપ્ત કરી વોન્ટેડ અન્ય 3 આરોપીને પકડી લેવા ચક્રો ગતિમાન કર્યા છે. બહુચરાજીના આકબાના ઇસમે દારૂ મંગાવ્યો હોવાનું તપાસમાં ખુલ્યું છે.
એલસીબીના એએસઆઈ કેસરીસિંહ અને કોન્સ્ટેબલ મહેશ ચૌધરીને ખાનગી બાતમી મળી હતી કે વિદેશી દારૂનો જથ્થો ભરીને એક કાર કાલરીથી બહુચરાજી તરફ જઈ રહી છે જેને આધારે પીએસઆઇ એમ ડી ડાભી અને અને તેમની ટીમે બહુચરાજી રોડ પર શંકાસ્પદ કારનો પીછો કરી રવિન્દ્ર ભગવાનારામ જુજાજી દેવાસી રહે પંચલા તા સાચોર રાજસ્થાન તથા કલ્યાણસિંહ રાણસિંહ રાજપુત રહે.ચાડી જી બાડમેર બંનેને પકડી પાડ્યા હતા અને કારની તલાસી લેતા બમ્પરના ભાગમાં ચોર ખાનું બનાવીને છુપાવેલા 64000 નો વિદેશી દારૂનો જથ્થો મળી આવ્યો હતો. પોલીસે કાર મળી 3.74 લાખનો મુદ્દામાલ જપ્ત કરીને તપાસ કરતાં બહુચરાજી ના આકબા ગામના પ્રવિણસિંહ મોહનસિંહ ઝાલા નામના આરોપીએ આ દારૂ મંગાવ્યો હતો અને મૂળ સાંચોરના અને હાલ અમદાવાદ મધ્યે રહેતા રાજુભાઈ નામના કોઈ ઇસમે મોકલાવ્યો હતો.
