ગાંધીનગરના ચ – 0 સર્કલ પાસે ઘાસ ભરેલી આઈસર ટ્રકમાં વિકરાળ આગ ભભૂકી, સદભાગ્યે જાનહાનિ ટળી
ગાંધીનગરનાં ચ – 0 સર્કલ નજીક ગઈકાલે રાત્રિના સમયે ડાંગરનું ઘાસ ભરેલી આઈસર ટ્રકમાં અચાનક આગ લાગતાં દોડધામ મચી ગઈ હતી. જો કે ગાંધીનગર ફાયર બ્રિગેડની ટીમે તાત્કાલિક સ્થળ પર પહોંચી પાણીનો સતત છંટકાવ કરીને મોટી જાનહાનિ થતાં અટકાવી હતી. ત્યારે ટ્રક આગની લપેટમાં આવી જતાં ઘાસની 250 ગાંસડી બળીને ખાખ થઈ હતી.
ગાંધીનગરના ચ – 0 રોડ ઉપર ગઈકાલે રાત્રે ધણીયોલ તરફ જતી ઘાસની ગાંસડીઓ ભરેલી આઈસર ટ્રકમાં અચાનક આગ લાગી ઉઠતાં રાહદારી વાહન ચાલકોનાં જીવ તાળવે ચોંટી ગયા હતા. બાવળાથી નીકળેલી ટ્રક ગઈકાલે ગાંધીનગર થઈને ધણીયોલ ગામ તરફ જઈ રહી હતી તે દરમિયાન રોડ પરથી પસાર થતી ટ્રકમાં અચાનક લાગેલી આગે વિકરાળ સ્વરૂપ ધારણ કરી લીધું હતું. જેનાં લીધે ટ્રાફિક જામનાં દ્રશ્યો પણ સર્જાયા હતા.
આઈસર ટ્રકનો ડ્રાઈવર અને કલીનર ડાંગર નાં ઘાસની 250 ગાંસડીઓ લઈને બાવળા થી નીકળી વાયા ગાંધીનગર થઈને ધણીયોલ ગામ જઈ રહ્યા હતા. એ સમય દરમ્યાન કોઈ કારણસર અચાનક ટ્રકમાં સ્પાર્ક થવાની સાથે જ આગ ભભૂકી હતી. જેનાં લીધે સૂકું ઘાસ સળગવા માંડતા ડ્રાઈવર અને કલીનર ટ્રક સાઈડમાં કરીને નીચે ઉતરી ગયા હતા.
ત્યારબાદ ઘટનાની જાણ ગાંધીનગર ફાયર બ્રિગેડને કરાતાં સબ ફાયર ઓફિસર કે જે ગઢવી સ્ટાફના માણસો સાથે તાત્કાલિક ઘટનાસ્થળે દોડી ગયા અને આગ પર કાબુ મેળવવાના પ્રયત્નો શરૂ કરી દેવામાં આવ્યા હતા. આઈસર ટ્રકમાં લાગેલી આગે વિકરાળ સ્વરૂપ ધારણ કરી લેતાં જોત જોતામાં ઘાસની ગાંસડીઓ સળગી ઉઠતા દૂર દૂર સુધી ધુમાડાના ગોટેગોટા નજરે પડી રહ્યા હતા. ત્યારે ફાયર બ્રિગેડની ટીમે સતત પાણીનો મારો ચલાવીને આગ ઉપર કાબુ મેળવી લઈ મોટી જાનહાનિ થતાં અટકાવી હતી.
