ભુજ તાલુકાનાં રાયધણપરની મીઠી નદી પાસે પૂરવેગે દોડતા ટ્રેઈલરના કારણે અકસ્માતની ભીતી

ભુજ ખાતે આવેલ રાયધણપર ગામની મીઠી નદી પાસે દરરોજ નાની મોટી અકસ્માતની ઘટના બની રહી છે. અહીંથી પુરપાટ-બેદરકારીથી પસાર થતાં મીઠાંનાં ટ્રેઇલરો લોકોના જીવ પર જોખમ સર્જી રહ્યાં છે. આ ગ્રામ્ય વિસ્તારમાંથી દોડતા મીઠાં ભરેલાં ટ્રેઇલરો રાયધણપર ગામની નદીનાં ચઢાણને પાર કરવા સામે છેડેથી પૂરવેગે દોડાવવામાં આવી રહ્યા છે. જેમાંથી અમુક ટ્રેઇલરો નદીનું ચઢાણ ચડી ન શકતા પાછા ફરે છે અથવા તો નદીમાં ઉથલી પડે છે. સૂત્રો દ્વારા માહિતી મળી રહી છે કે આ ટ્રેઇલરો નદીમાં પાછા પડીને ઉથલે ત્યારે ટ્રેઇલરની પાછળ આવતાં વાહન, રાહદારી, ગાયોના ટોળાં તેની નીચે કચળાઈ જાય તેવી સંભવાના રહેલી છે. અહી નોંધનીય બાબત એ છે કે મીઠાંનાં આ ટ્રેઇલરોમાં મોટાભાગે નંબર પ્લેટ પણ જોવા મળતી નથી,   ઉપરાંત પૂરવેગે ટ્રેઈલર દોડવાતા ટ્રેઇલરના ચાલકો એક હાથે મોબાઇલમાં વ્યસ્ત રહે છે. ગત  બુધવારે પણ મીઠું ભરેલ એક ટ્રેઇલર રાયધણપરની નદીમાં ચઢાણ ન ચડી શકતાં ઉથલી પડયું હતું સદભાગ્યે કોઈને ઇજા થઈ ન હતી.