ગળપાદર જેલમાં મુલાકાતીએ હવાલદાર પર હુમલો કર્યો  

પૂર્વ કચ્છની જિલ્લા જેલ ગળપાદરમાં કેદીને મળવા આવેલા મુલાકાતી ને મોબાઇલ બહાર રાખવાનું કહેતાં  ઉશ્કેરાયેલા  શખ્સે કોન્સ્ટેબલ ઉપર હુમલો કરી કાનના પડદા ફાડી નાખ્યા હતા.  સરકારી કર્મચારીને હાથમાં અસ્થિભંગ સહિતની ઇજાઓ પણ પહોંચી હતી. પૂર્વ કચ્છની જિલ્લા જેલ ગળપાદરમાંથી મોબાઇલ મળવા સહિતના મુદ્દે સમયાંતરે ચર્ચામાં રહેતી હોય છે તેવામાં  સાંજના આરસામાં   જેલમાં હવાલદાર તરીકે ફરજ બજાવતા ફરિયાદી પોતાની  ફરજ ઉપર મુલાકાત  રૂમમાં  હતા ત્યારે જેલમાં રહેલા શખ્સ નો ભાઇ  તેને મળવા આવ્યો હતો, જેથી ફરિયાદીએ આ આરોપીને મોબાઇલ  બહાર જમા  કરાવી બાદમાં મુલાકાત માટે આવવાનું કહેતાં આ શખ્સ ઉશ્કેરાઇ ગયો હતો અને બે દિવસ પહેલાં મારી મા પણ મારા ભાઇને મળવા આવી હતી ત્યારે મારા ભાઈ  સાથે મુલાકાત કેમ ન કરવા આપી તેમ કહી ફરિયાદી સાથે ઝઘડો  કર્યો હતો  અને  બાદમાં ફરિયાદી ઉપર હુમલો કરી ડાબા કાનમાં લાફા ઝીંકી દીધા હતા. રાડારાડ થતાં મારા ભાઇને મળવા નહીં આપો તો જાનથી મારી નાખવાની ધમકી આપી આ  શખ્સ ત્યાંથી નાસી ગયો હતો. બાદમાં તેની માતા ત્યાં આવી  ફરિયાદીને  ગાળો  આપી એટ્રોસીટીનો કેસ  કરી આત્મહત્યા કરી લઇશ તેમ કહી જાનથી મારી નાખવાની ધમકી આપી આ મહિલા  પણ ત્યાંથી  જતા રહ્યા હતા. બનાવમાં ઘવાયેલા સરકારી કર્મીને સારવાર અર્થે લઇ જવાતાં તેમના હાથની આંગળીમાં અસ્થિભંગ તથા ડાબા કાનનો પડદો ફાટી ગયો હોવાનું બહાર આવ્યું હતું. સરકારી કર્મીને માર મારી તેમની ફરજમાં રૂકાવટના આ પ્રકરણમાં પોલીસે ફરિયાદ નોંધી આગળની કાર્યવાહી હાથ ધરી હતી .