ધોરડોનાં સંમેલનમાં આજે કચ્છી કલાકારો જમવાશે રંગ
ધોરડોનાં સંમેલન ખાતે કેન્દ્રીય ગૃહમંત્રી અમિત શાહ અને મુખ્યમંત્રી વિજયભાઇ રૂપાણીના અધ્યક્ષ સ્થાને સરહદી વિસ્તાર વિકાસ કાર્યક્રમ અન્વયે યોજાનાર સરપંચ સંમેલનમાં રમત-ગમત, યુવા અને સાંસ્કૃતિક પ્રવૃત્તિઓ વિભાગ દ્વારા સાંસ્કૃતિક કાર્યક્રમ યોજાનાર છે. જેમાં કચ્છના કલાકારો દ્વારા આજે રાત્રે કચ્છી સંસ્કૃતિને પ્રખ્યાત કરતા સાંસ્કૃતિક કાર્યક્રમ રજૂ કરાશે. રમત-ગમત, યુવા અને સાંસ્કૃતિક પ્રવૃત્તિઓ વિભાગે રજૂ કરવામાં આવનાર આ સાંસ્કૃતિક કાર્યક્રમમાં માત્ર કચ્છ જ નહીં, પણ ગુજરાતનાં અનેક પ્રાંતની સાંસ્કૃતિક વિરાસતને પણ આવરી લેવામાં આવી છે. જેમાં કચ્છના જાણીતા લોકગાયક પુનશી ગઢવી તથા સ્થાનિક વિવિધ કલાકારોનો નાદ કચ્છની ધરોહર અને વિકાસ ગાથાને કચ્છની સંસ્કૃતિના કાર્યક્ર્મરૂપે રજૂ કરવામાં આવી રહી છે. આ ગાથામાં કચ્છી ગરબો, મણિયારો, સુરેન્દ્રનગર અને ભાવનગરનો મિશ્ર રાસગરબા તથા કચ્છની સોઢા જાતિ કે જે પાકિસ્તાનથી આવીને અહીં વસી છે. તેમની શૌર્યતા અને વીરતાને પણ આવરી લેતો તલવાર રાસ સાંસ્કૃતિક શૈલીમાં વણી લઇ રજૂ કરવામાં આવશે. કચ્છ જિલ્લો તેના પરંપરાગત રૂઢી અને સાંસ્કૃતિક મૂલ્યો, કલા, હસ્તકળા અને રચનાત્મકતા માટે જાણીતો છે. કચ્છી લોકનૃત્ય ઘણા વર્ષોથી અસ્તિત્વમાં છે. જેને ધ્યાને લઈ અહીંના કલાકારો દ્વારા કાર્યક્રમની આ રીતે ઉજવણી લોકનૃત્ય સ્વરૂપે રજૂ કરવામાં આવશે.
-મળતી માહિતી
