અમદાવાદના બાપુનગરમાંથી SOGએ રૂ.1 લાખના MD ડ્રગ્સ સાથે યુવકને ઝડપ્યો
સ્પેશિયલ ઓપરેશન ગ્રુપની ટીમે બાપુનગર સુંદરમ નગરમાંથી એક યુવકને રૂ.1 લાખના એમ ડી ડ્રગ્સ સાથે પકડી પાડ્યો હતો. એસઓજીની ટીમને મળેલી બાતમીના આધારે પીઆઈ એ.ડી.પરમાર તેમજ સ્ટાફે બાપુનગર સુંદરમનગરમાં વોચ ગોઠવી ત્યાંથી પસાર થતા મોહંમદ આઝમ ઉર્ફે ટાઇગર મોહંમદ સલીમ શેખને રોકીને તપાસ કરતા તેની પાસેથી મેફેડ્રોન (9 ગ્રામ 690 મિલીગ્રામ-કિં.રૂ.96,900) મળી આવતાં પોલીસે આરોપી સામે એનડીપીએસ એક્ટની કલમ 8(સી)21(બી),29 મુજબ ગુનો નોંધી અટકાયત કરી હતી.
આરોપીના ગુનાહિત ભૂતકાળની તપાસ કરતા તેની સામે પૂર્વે શહેરકોટડા, અમરાઈવાડી, બાપુનગર તેમજ અન્ય પોલીસ સ્ટેશનોમાં 25 જેટલા ગુના દાખલ થતાં હોવાનું તથા તેની સામે પાસા અને તડીપાર જેવાં અટકાયતી પગલાં લેવાયાં હોવાનું જાણવા મળ્યું હતું.પોલીસે આરોપીની પૂછપરછમાં તેણે બાપુનગરમાં રહેતા અસદ પાસેથી આ મેફેડ્રોન મેળવ્યાનું બહાર આવ્યું હતું.
