દીકરીએ પ્રેમલગ્ન કરતાં પરિવારને પસંદ ન આવ્યા, વિરાણીથી ફિલ્મી ઢબે દીકરીનું કર્યું અપહરણ

નખત્રાણાના વિરાણી ગામમાં રહેતી દીકરીએ પ્રેમલગ્ન કરતા તે વાતનું મનદુઃખ રાખીને ખુદ તેના માતા-પિતા સહિત પિયરપક્ષના સભ્યોએ અપહરણ કર્યું હોવાની ઘટના પ્રકાશમાં આવી છે. ફિલ્મી ઢબે કરેલ આ અપહરણની આ ઘટનામાં જમાઈના પરિવારે પોલીસને જાણ કરી દેતા નખત્રાણા પોલીસે નાકાબંધી કરીને આ દીકરીને છોડાવી હતી. નખત્રાણા પોલીસ મથકેથી જાણવા મળતી વિગતો મુજબ, વિરાણી ગામમાં રહેતા જેન્તી માલા ખજુરિયાએ દોઢ માસ પૂર્વે કોડકી ગામની જ્યોતિકા પટેલ નામની યુવતી સાથે પ્રેમલગ્ન કર્યા હતા.

છેલ્લા એક મહિનાથી જ્યોતિકા તેના પતિ સાથે વિરાણી ગામમાં રહેતી હતી. આ દરમિયાન રવિવારે બપોરે પોણા બાર વાગ્યાની વેળામાં GJ 12 BF 6927 નંબરની ઇનોવા કારમાં જ્યોતિકાના માતા-પિતા સહિત 6 સભ્યો તેને મળવાના બહાને ઘરે આવ્યા અને સાસરીયાઓ સાથે બોલાચાલી કરી ફિલ્મી ઢબે મારકૂટ કરી હતી. જેથી દીકરીના સસરા માલાભાઈ દોડી આવ્યા ત્યારે એક ઇસમે તેને છરી બતાવી ઘરમાં ન જવા દઈ માથા અને ખભાના ભાગમાં ઇજા કરી હતી. ઘટનાના પગલે નજીકમાં આવેલ દુકાન ચાલક દોડી આવ્યો હતો.જેને પણ આરોપીઓએ છરી બતાવી ત્યારબાદ આરોપીઓએ જ્યોતિકાને ઇનોવા કારમાં બેસાડી અપહરણ કરી ભાગી ગયા હતા.

અપહરણની આ ચકચારી ઘટનાની જાણ નખત્રાણા પોલીસને કરાતા તાત્કાલિક માનકુવા પોલીસને જાણ કરી રસ્તામાં ઠેરઠેર નાકાબંધી કરી દેવાઈ હતી અને પોલીસની તાત્કાલિક કાર્યવાહીના કારણે નાગિયારી પાસે કારને રોકાવી લેવાઈ હતી.બાદમાં જ્યોતિકાને પુછતા તેણે પતિના ઘરે જવાનું કહ્યું હતું. ત્યારબાદ સસરા માલાભાઈએ પુત્રવધૂના અપહરણ, એટ્રોસીટી સહિતની કલમો હેઠળ નખત્રાણા પોલીસ મથકમાં ફરિયાદ દાખલ કરાવી હતી. જેના આધારે પીઆઇ રાકેશ ઠુમમરે આગળની તપાસ હાથ ધરી છે. આરોપીઓને ભુજ એ ડિવિઝન પોલીસની કસ્ટડીમાં રાખવામાં આવ્યા હોવાનું જાણવા મળ્યું છે.