સુરેન્દ્રનગરના સાયલામાં કેમિકલ ચોરી પ્રકરણમાં નાસતો ફરતો આરોપી પકડાયો
સુરેન્દ્રનગરના સાયલા પોલીસ મથકમાં દાખલ થયેલા કેમિકલ ચોરીના ગુનામાં નાસતા ફરતા આરોપીને પેરોલ ફર્લો સ્કવોડે દલતુંગી ગામેથી પકડી પાડ્યો હતો. જેનો સાયલા પોલીસને કબજો સોંપવાની તજવિજ હાથ ધરવામાં આવી છે. પોલીસ સુત્રોમાંથી મળતી માહિતી મુજબ જામનગર પેરોલ ફર્લોના પીએસઆઇ એલ.જે.મિયાંત્રાના માર્ગદર્શન હેઠળ પોલીસ ટુકડી નાસતા ફરતા આરોપીઓને ઝડપી પાડવા માટે પેટ્રોલિંગમાં હતી તે દરમિયાન વર્કઆઉટના અંતે પોલીસ ટીમને સાયલા પોલીસ મથકના કેમિકલ ચોરી સંબંધિત ગુનામાં નાસતા ફરતા આરોપી હમીર જગાભાઇ ખાંભલા ઉર્ફે જેસા વિશે બાતમી મળી હતી.
જેના આધારે પોલીસે લાલપુર તાલુકાના દલતુંગી ગામમાં જઇ નાસતા ફરતા આરોપી હમીર ઉર્ફે જેસા જગાભાઇ ખાંભલાને ઝડપી પાડ્યો હતો. જેનો કબજો પેરોલ ફર્લો સ્કવોડે સીટી એ પોલીસને સોપવામાં આવ્યો હતો ત્યારબાદ તેને સાયલા પોલીસ મથકને હવાલે કરવા માટે પ્રક્રિયા હાથ ધરવામાં આવી હતી. આ કાર્યવાહી પીએસઆઈ એલ.જે. મિયાત્રાના માર્ગદર્શન હેઠળ સ્ટાફના ગોવિંદભાઈ પરમાર, લગધીરસિંહ જાડેજા, કરણસિંહ જાડેજા, ગજેન્દ્રસિંહ જાડેજા, મહિપાલભાઈ સાદીયા, ભરતભાઈ ડાંગર સહિતની ટીમ દ્વારા કરાઈ હતી.
