અમરોલીમાં મિત્રના બર્થડે પર મોઢામાં પેટ્રોલ ભરી સ્ટંટ કરતો યુવક ગંભીર રીતે દાઝતા હોસ્પિટલ ખસેડાયો
copy image
અમરોલી કોસાડ આવાસમાં મિત્રના જન્મ દિવસની ઉજવણીમાં પેટ્રોલ વડે સ્ટંટ કરતો યુવક મોઢામાં પેટ્રોલ ભરી હવામાં ભડકો કરતો હતો. તે દરમિયાન પેટ્રોલ તેના ચહેરા પર ઉડતા યુવક દાઝયો હતો. ગંભીર રીતે દાઝી ગયેલા યુવકને સારવાર અર્થે સ્મીમેર હોસ્પિટલમાં દાખલ કરાયો છે.
મળતી માહિતી અનુસાર અમરોલી કોસાડ આવાસ મધ્યે રહેતો અજય સુશાંતભાઈ મિશ્રા(20) કાપડના કારખાનામાં કામ કરે છે. ઘર નજીક રહેતા મિત્રનો જન્મદિવસ હોવાથી ઉજવણીનું આયોજન કરાયું હતું. મિત્રના જન્મ દિવસની ઉજવણી દરમિયાન અજય મોઢામાં પેટ્રોલ ભરી હવામાં ભડકો કરવાનો સ્ટંટ કરી રહ્યો હતો. આ સમય દરમિયાન પેટ્રોલનો ફુવારો તેના ચહેરા પર જ પડતા અજય ચહેરાના ભાગમાં ગંભીર રીતે દાઝયો હતો. ઘર નજીકના ક્લિનીકમાં સારવાર પછી અજયને સારવાર માટે તેના દાદાએ સ્મીમેર હોસ્પિટલ ખસેડ્યો હતો. ઘટનાની જાણ થતા અમરોલી પોલીસ હોસ્પિટલ દોડી આવી હતી અને તપાસ શરૂ કરી હતી.
