મોટી સારસી ગામથી દારૂ સાથે 3 શખ્સ પકડાયા

દાહોદના મોટી સારસી ગામથી ગતરોજ કોમ્બીંગ નાઇટ રાઉન્ડ પેટ્રોલીંગ દરમિયાન ઇકો ગાડીમાંથી 34,272 રૂપિયાના દારૂ સાથે ગરબાડા તાલુકાના ત્રણ શખ્સને પોલીસે પકડી પાડ્યા હતા. જથ્થો, ત્રણ મોબાઇલ અને ઇકો મળી 2,49,272 રૂપિયાનો મુદ્દામાલ કબ્જે કરી તાલુકા પોલીસે ગુનો નોંધ્યો હતો.

દાહોદ તાલુકા પોલીસને ગતરોજ કોમ્બીંગ નાઇટ રાઉન્ડ પેટ્રોલીંગમાં દરમિયાન પીએસઆઇ એન.એન.પરમારને દારૂ અંગેની બાતમી મળી જેના આધારે મોટી સારસી ગામમાં અમદાવાદ ઇન્દોર હાઈ-વે રોડ પીએસઆઇ તેમજ સ્ટાફના નિતેશભાઇ કનુભાઇ, નરપતસિંહ રતનસિહં, સુરેશભાઇ ગુલસીંગભાઇ, વિનોદભાઇ દિપસીંગભાઇ તથા અભેસિંગભાઇ વિરસીંગભાઇ વોચમાં હતા.

તે દરમિયાન બાતમી મુજબની GJ-23-BL-1639 નંબરની ઇકો ગાડી આવતાં તેને અટકાવી હતી. તેમાં સવાર ગરબાડા તાલુકાના બોરીયાળી ગામનો અરવિંદ અમરસીંગ ખનોડ (ગારી), ભેગારીનો રાકેશ મોહન દેવડા (ગારી) તથા વિપુલ જંગલસીંગ ભુરીયાને નીચે ઉતારી ગાડીમાં તપાસતા 34,272 રૂપિયાની ઇંગ્લિશ દારૂની 336 બોટલો મળી આવી હતી. જથ્થો તેમજ ત્રણ મોબાઇલ જે રૂ.15,000ના તથા હેરાફેરીના ઉપયોગમાં લેવાયેલ રૂા. 2 લાખની ઇકો કાર મળી કુલ રૂા. 2,49,272 નો મુદ્દામાલ કબ્જે કરી ત્રણેય સામે તાલુકા પોલીસે દારૂનો ગુનો દાખલ કરી કાર્યવાહી હાથ ધરી હતી.